आज झोपच आली नाही ....

एकाही कोड्याची उकल झाली नाही

गुंतलेली दोन टोकं सोडवता आली नाही 

का कोण जाणे ?

आज झोपच आली नाही ....

रात्र दाराशी उभी ,चंद्र उंबऱ्याशी थांबलेला 

पापण्यांची शिंपली बंदच झाली नाही 

का कोण जाणे ?

आज झोपच आली नाही ....

वाट पाहताना रस्ता लांबलेला 

पण वळणावरून सदाच आली नाही 

का कोण जाणे ?

आज झोपच आली नाही ....

ओंजळ प्रकाशाने भरलेली , दिवा तेवत ठेवलेला 

नंदादीपाची वात मंदच झाली नाही 

का कोण जाणे ?

आज झोपच आली नाही ....

पापण्यांच्या काठावर विसावलेले मोती

उठलेल्या तरंगाची लाटच झाली नाही 

का कोण जाणे ?

आज झोपच आली नाही ....

कुठे खपली कुठे ओलावा , आत खोलवर दाह

वेदना या जखमेची सहनच झाली नाही

का कोण जाणे ?

आज झोपच आली नाही ....