विहीणबाई

काल पाजविला मी 

मायेचा पान्हा - पाझर ,

वेल मोगरीची दारी 

नकळत चढली झरझर 

विभ्रम विलोल देखणे 

वाऱ्यापरी अवखळ ,

विसंबले न मी कधी 

दूर केले न पळभर   

लहानाची केली मोठी 

तेल घालूनिया डोळी , 

पूर्ण बहरेल सासरी 

फुलेल पाकळी पाकळी 

चाफ्यासाठी हिरव्या तुमच्या 

जतन केली जाई ,

पालन करा मायेने 

आता तुम्हीच तिची आई 

लाडली लाडकी आमची 

तळहाताचा असे फोड ,

शोभेल तुमच्या घरी 

नारायण लक्ष्मीचा जोड 

चंदन तुमचा लेक 

घासलिया दर्वळे वास ,

माझ्या लेकीच्या गुणांचा 

जाणावे आपोआप सुवास 

श्रीफळ तुमचा लेक 

लेक माझी द्राक्षघोस  ,

लेकीवाचून वाटे आम्हा 

घर भरले ओस - ओस 

भास्कर तुमचा लेक 

लेक माझी चंद्रमा ,

श्री शंभू तुमचा लेक

त्या शोभे माझी उमा 

हिरा पैलूदार दिधला 

माझे रिकामेच कोंदण ,

तुळस वृन्दावानीची दिली 

माझे रिकामे रिकामे अंगण 

नाही दुखावले मूळ 

प्राजक्त ठेविला हाती ,

काळजातील रितेपण अपार 

बाप मायीची आता साथ  

आठवणींची रातराणी ही 

डवरेल माझिया दारी ,

बहर खुडूनी नेता 

घर तुमचे गंधभारी

धनाची दिली पेटी 

पित्याचे उदास मन ,

ओटीत घालते विहीणबाई   

रूप गुणांची माझी खाण 

बाळीला नित लाभावी 

तुमच्या पदराची सावली ,

भर्जरी शेल्याची वेलबुट्टी 

जपा बनून माउली 

लेकीच्या कुशीतून उद्या 

वंश वेलीला लाभेल फुटवा ,

सांजेला गहिवरता लेक 

माहेर तुमचेही आठवा 

कधी पाझरता नेत्र तिचे 

पाठीवरून फिरवा हात ,

माय - पित्याची दाटता सय 

धाडा गौरीला एक रात 

जपा काळजाचा माझ्या घड 

विनविते जोडूनिया हात ,

सुख शांती समाधानाची 

लेक माझी करेल बरसात 

डोळियांच्या पंचगंगेचा महापूर 

धावतो गोदामायीच्या भेटी ,

सांगा कशी विसरावी 

तान्हुलीच्या 

चांदण हाताची गळामिठी 

~ Unknown