"रस्ता ओलांडताना डावीकडे पहा नंतर उजवीकडे . कोणतीही वाहन नाही याची खात्री करूनच रस्ता ओलांडा." अगदी शाळेत असल्यापासून शिकत आलोय हे सगळ आपण . आणि त्या सूचनांच्या यादीमध्ये एक ठळक सूचना "रस्ता ओलांडण्यासाठी झेब्रा क्रॉसिंगचा वापर करा "
आठवतंय ???
आता तुम्ही म्हणाल …. रस्ता कसा ओलांडायचा हे सांगायला ही पोस्ट लिहिली आहेस का ग ?
नाही ……
" कसा ओलांडायचा " हे सांगण्यासाठी नाही तर " कसा ओलांडला " हे सांगायची फार उत्सुकता लागली आहे
खूप जुना परिपाठ आहे. कडेवर पिल्लाला सांभाळत ,खांद्यावरच्या ओझ्याला कोपराने आधार देत , एका हाताने पदर सावरत रस्ता ओलांडणारी आई आपण बऱ्याच वेळा पहिली आहे . तसे क्रॉस करण्यासाठी झेब्रे फार कमी आहेत आणि जे आहेत हे बिनकामाचे म्हणत ती जागा मिळेल तिथून वाट शोधत असते
आता रस्ता क्रोस कधी करायचा ? कधीही .
तुम्ही खुशाल झेब्रा क्रॉसिंग ठेवाल हो . लाल , हिरवे, पिवळे दिवे जिथे थांबवत नाहीत आम्हाला तिथे हे काळे पांढरे पट्टे काय कामाचे ? आपला सिग्नल हिरवा झाला कि नाही या पेक्षा शेजाऱ्याचा पिवळा झाला का यावर लक्ष ठेवणारे महाभाग जास्त . हे काळे पांढरे पट्टे म्हणजे टेम्पररी पार्किंग झालय लोकांसाठी . पादचाऱ्याना फरक पडत नाही आणि गाडीवाले फरक पाडून घेत नाहीत . इतक्या वर्षांचा चुकवाचुकवीचा अनुभव आणि धावण्याच स्किल कमी पडून एखादा अपघात झालाच तर तुम्ही पायी चालताय की गाडीतूनच डोकावताय यावर चूक कोणाची हे ठरत . आता पायी चालत असाल तर म्हणाल "कुणाची तार आलीये लेका ??? हे गाडीवाले माजलेत " आणि गाडीत असाल तर म्हणाल "आडवी यायला माझीच गाडी मिळाली तुला ?"
या एवढ्या सगळ्यांना सहन करत क्रॉस करण्यापेक्षा जागा मिळेल तिथून घुसणारी ती साडी सावरणारी आई काय चुकीची ?
बर … हे सगळ राहू द्या …. सांगायचं हे न्हवतच मला . कोणाबद्दलही तक्रार नाही करायची आहे . एक आगळा वेगळा अनुभव तुमच्याशी शेअर करायचा आहे .
तसे बरेच दिवस झाले आता इथे राहायला येउन . जर्मनी आता चांगलाच पचनी पडलय. जागा बदलली की हवेचा वाहायचा वेगही बदलतो त्यात या नियमांचं काय ? इथे आलेल्या पहिल्या दिवशीचा हा किस्सा :) झेब्रा क्रॉसिंग . आल्या आल्या अहोनी बजावलं "सौ . रस्ता ओलांडताना झेब्रा क्रॉसिंग असेल तरच ओलांडा." माझ्या डोक्यात अजूनही तेच झेब्रे होते ना जिथून ओलांडयाच म्हटलं तरी आजू बाजूचे वेड्यात काढतील .
पिल्लाला थोडी थंडी अनुभवावी म्हणून घुमी घुमी करायला बाहेर पडले(घुमी घुमी म्हणजे पिल्लाच्या मैत्रिणीच्या भाषेत फिरायला जाण :) ) बालभाषा …दुसर काय. तसं पाहण्यासारखं बरंच होत रस्त्यात आणि पिल्लाचेही स्टंट सुरु होते जोडीला . हो…. स्टंटमँन आहे तो . ' तारे जमीन पर ' पहिल्यापासून तो ही बाबागाडीच्या पुढच्या बाजूवर स्वतःला झोकून देऊन titanic पोज मध्ये उभा असते . मुव्ही मधला ' इशान दादा ' असाच करतो ना बसमधून बाहेर येउन. बाबागाडी याला बसायला आणली आहे की उभी राहायला याचा कधीतरी आम्हालाच विसर पडतो :)
आपण कुठे होतो बर ? घुमी घुमी …
रोड क्रोस करायचा होता … सगळ्या BMW आणि Mercedes झुप झुप करत वेगाने धावत होत्या . झेब्रा क्रोसिंग तस अजूनही ८ - १० पावलांवर होत . तिथे जाऊन पोहोचते न पोहोचते तोवर दोन्ही बाजूच्या गाड्या नेट कनेक्शन ऑफ होऊन youtube विडीओ थांबवा तश्या एका क्षणात थांबल्या . मी ही थोडी दचकलेच . म्हटलं काय झाल काय नक्की ?
सगळे थांबले म्हणून मी ही आपली पावलं आहे तिथेच रोवली. कुठून काही वेगळ घडतंय का याची वाट पाहत . फार …. उशिरा लक्षात आल . हे सगळे माझ्यासाठी थांबलेत :) नियम मोडण्यासाठी नाही तर पाळण्यासाठी बनवले आहेत इथे :) पायी चालणाऱ्याला आदर देण्याची एक पद्धत . वेळ आणि गती समोरच्या जिवंत माणसापेक्षा जास्त महत्वाची नाही हे सांगणार इथल झेब्रा क्रोसिंग
फार वेगळ वाटल हे पाहिल्यावर . १०० पेक्षा जास्त वेग असणारी गाडी चालणाऱ्यासाठी येउन थांबते आणि त्याचा आदरही वाटला .
पण एक सांगू ? अगदी प्रामाणिक…. रोड क्रोस करण्याची मज्जा यात नाही हो . ती प्रत्येक गाडीला चुकवत पाळण्यातच आहे :)
