कोरफडीच्या रोपाची काळजी कशी घ्याल ?

 

या फोटो मधील माझे कोरफडीच्या रोप आता साधारण ३ वर्षांचे आहे. खरेदी केले तेव्हा खूपच लहान आणि एकच देठ होते . आता याची भरपूर रोप झाली आहेत. याची जोपासना करताना माझ्या लक्षात आलेल्या काही गोष्टी इथे नमूद करत आहे. कोणालातरी या अनुभवाचा उपयोग व्हावा म्हणून.

कोरफडीची वाढ इतर रोपांपेक्षा खूप संथ असते. याला वाढताना पाहायचे असेल तर तुमच्यामध्ये खूप संयम असायला हवा

माझ्या माहितीप्रमाणे याला खूप कमी पाणी लागते. मी आठवड्यातून एकदा आणि खूप उन्हाळा असेल तर २ वेळा देते.मातीचा वरचा थर नेहमी मोकळा असेल याची काळजी घा. जास्त पाण्याने झालेला चिखल या रोपाला आवडत नाहीं. माती फारच मऊ आणि चिकट असेल तर त्यात थोडी वाळू एकत्र करावी. 

बऱ्याच वेळा कोरफड फक्त जास्त पाणी घातल्यामुळे आणि मातीतून पाण्याचा निचरा न झाल्यामुळे मारून जाऊ शकते. 

पाणी जास्त झाले तर याची पाने तपकिरी होऊन गळून पडताना मी पहिली आहेत. ही पाने सुकलेल्या पांनांपेक्षा वेगळी दिसतात. यामध्ये आतून पाणी भरलेले दिसते. 

मी कोरफड साठी कुंडी निवडताना पसरट कुंडी निवडली होती. ज्याला पाण्याचा निचरा होण्यासाठी खाली रिकामी जागा होती. कदाचित यामुळे माझे रोप पसरट वाढले असावे.

याच्या मुळांपासून नवीन फुटवे येऊन नवी रोप आजूबाजूने तयार होतात. 

जर कधी वातावरण फार जास्त थंड असेल तर हे रोप घराच्या आत घ्या. थंड वातावरणात हे रोप खराब होते. मी याला ४ महिने indoor आणि ८ महिने outdoor ठेवते. 

सुकलेली पाने हाताने ताकद लावून उपसण्याचा प्रयत्न करू नका. रोप अगदी खोलवर गेले नसेल तर मुळा सहित हातात येऊ शकते. शक्यतो कात्रीने हलके कापून घ्या.

या झाडाला कोणत्याची खताची सहसा गरज नसते. वर्षातून एकदा मी शेणखत वापरले आहे.